Во рамки на платформата PlayUK, Британскиот совет, во партнерство со Нордеус Хаб и СГА (Српско здружение за игри), во Белград во јануари 2020 година го организираше фестивалот PlayUK 2020, кој на едно место собра развивачи на игри, дигитални уметници и креативци од гејминг индустријата.
Беа избрани 30 учесници од регионот, од кои шест македонски претставници, кои имаа можност да ги подобрат своите вештини во наративен дизајн, UI/UX дизајн, уметност, програмирање и други сродни области. Работилниците ги водеа предавачи кои се пионери во нивните области, вклучувајќи ги Џо Твист, Калум Андервуд, Џон Мекелен и други.
Диме Ѓорѓиевски е 2Д аниматор од Скопје, еден од учесниците на работилницата, кој во оваа прилика изјави:
„Бидејќи веќе имав искуство со PlayUK во Скопје минатата година, веднаш знаев дека настан како овој ќе биде одлична можност за мене како човек кој сака да игра и да креира видео игри. Очекувам да научам нови работи и да се сретнам со нови луѓе кои работат со најразлични интерактивни медиуми.“
