Овој проект ја раскажува приказната за одржлив дизајн, нула отпад и покажува како текстилниот отпад се претвора во уникатни креации. Неколку млади дизајнери, Емануела Трајческа, Сара Реџиќ, Ева Зарезанкова, Натали Наумова, Радица Лазова, Катерина Димитровска, Мирјана Јосифоска и Дана Ќосева подготвија колекции-капсули направени од текстилен отпад и го завршија проектот под менторство на дизајнерката Ирина Тошева и гости од Велика Британија – талентираната дизајнерка Ана Скодбо која работи за брендот "Phannatiq" и една од водечките британски стилистики Ребека Рој.
Се здруживме во оваа особено важна иницијатива затоа што модната индустрија е втората економска гранка во светот, а со подемот на концептот за брза мода станува еден од главните виновници за загрозување на животната средина. Брза мода е современ израз што ја користат модните продавници за да се искаже дека дизајните брзо се движат од модната писта за да ги доловат тековните модни трендови. Резултат на брзата мода е тоа што околу 40% од купената облека се носи ретко или никогаш – во просек, облеката се носи само 3,3 пати во текот на животот – а околу една третина од облеката во малопродажба никогаш не се продава и затоа се пали или уништува на друг начин. Затоа брзата мода создава огромни количества отпад. Со овој проект сакаме да и дадеме втор живот на облеката и да ја цениме туѓата работа. Модата има моќ да предизвика позитивни промени, да создаде мерки против сегашните штетни системи.
Гостинките Ребека Рој и Ана Скодбо, кои работат на одржлива мода долго време, им ги покажаа на дизајнерите техниките за бавно производство, одржливи ткаенини, сертифициран органски памук, производство со нула отпад, вегански материјали и етички услови на производство. Ребека и Ана, исто така, се погрижија и за оваа фотосесија.
